أهلها
ندالة أهلها
ميت ألف فرصة عشان أسيب مصر
ولا عمري سبتها
علشان هى بلادي اللي بجد بحبها
بحبها بكدبها وصدقها
بحب فيها أصالة وندالة أهلها
بحب فيها السهر بحب
زيفها وأصلها
بحب فيها طلعة الشمس
تنور وشها
بحب فيها القمر طالع
يغازل حسنها
بحب فيها المشي علي شط
نيلها وبحرها
بحب فيها بناتها
راسمين ملامح شعبها
دي بنت مايصة وحاطة
وردة فـ شعرها
ودي بنت جد ونازلة
جري لشغلها
هتلاقي فين بلد
فيها الكنايس والجوامع
بتحضن بعضها
مسلم مسيحي إخوات
راضعين طيبة من صدرها
نبع الحنان ويناموا حاضنين
أرضها
هتلاقي فين تاني بلد
كل حاجه فيها
تخليك تحبها
هتقولي ظالمة هقولك
برضو بحبها
هتقولي ضالمة
مهو ده سواد شعرها
هتقولي زحمة هقولك
علشان بنعشق أرضها
هتقولي فيها فساد
هقولك ده من طيبة شعبها
جرب كده تسهر ولو وحدك
علي ضف نيلها وحبها
جرب تشوف بنت حلوة
مع شاب واقف جنبها
بيحبها شايل في قلبه
هموم الدنيا كلها
وبرضو بيحبها
جرب كده تاكل درة وترمس
علي شطها
وتشوف وشوش الناس
وإضحك زيها
طب وإنت ماشي لوحدك
ووقعت في مشكلة
مش بتلاقي ألف واحد
جنبك بيحلها
لا تعرفهم ولا يعرفوك
بس جمعكم حبها
اهي هي دي مصر
زاحمة ظالمة
فاسدة ضالمة مش مهم
ده كفاية خفة دمها
هافضل لمصر أقول وأعيد
أنا أصلي عاشق أرضها
.....................
وطبعا ده كله كلام في الهوا
أنا لو تجيني نص فرصة هقول لها
بالسلامة يا مصر
ومش عايز أشوف وشها
وهي دي بقى ندالة أهلها
